1 Corinthians 9

Bulus Wu Shi Wo Zhin Shekwoyi Tnu-Tnui

1Mi zhin tnu-tnuyinu Shekwoyi nya, toge ndna n zanyikoci ho sintan. Mi ɓei ku gye Yesu eyi Dagayi nʼma wye yi. Omi tnu-tnu nu na ɓe nʼfya wye-wyei doshan yi. 2Ndei na zaho wyegye mi to zhin tnu-tnuyi num, nʼfyaba mi zhin ko nu, ntuge fya kpe Yesu ye nʼma kun nu. 3Omi begbe-dna nyi na za ba n ɓa nya ɓenya.

4Mi to iko hoi lo ko fyewyim? Kwo mi ta mi, ngye a tnu-tnu-yi aje, ma zhin zhiɓei nʼfya puwa ma? 5Mi ɓei nyikwoi lo, woi zhin Yesu-viyi nu, to mi ye zan-lo laɓa n woi ce, she a tnu-tnu-yi aje zhin nyi, she Dagayi-azaje zhin nyi, njesun she Bitrus zhin nyi m? 6Kwo Barnaba nʼmi yi nu ɓa bwa tnu-tnu zhin nʼya bwa yi, ama fyei ga azaje anya? 7Fye shin soja ho gye woi gba wohim tukwo agyiwye? Fye shin fwa-yi ho gye to woi gyi wo fwa kaya m? Kwo fye shin Bolo-lo ho gye to woi sin wa nakwo madara ma? 8Mita gna fye zanyikoci ɓewyegye nu ge ko bmiya lon. Mi gna fye ɓo nu Shekwoyi wa da. 9Dna nʼwa Shekwoyi ɓei ga Musa nyi, Wa cige, to pa nakwo gbe esa ko gni koi dna awyi ga ho nkwa pita yim. Fye gye ge Shekwoyi ɓo zhin nubo n nakwoi nu gmanyi, esa Wo ɓei da cei lo nu nyi? 10Kwo woto ɓei zhin nubo nʼyi nu ma? Sosai kuwa. Wo ɓo da lonu Wa wu yi ge a Yesuviyi a tnu-tnuyi ɓa go lada n naza ba nɓa bma ɓa zhin. N fwa-nuyi yi, n nawyi luyi yi, ɓa na wyetu yi ɓa gyi ofwa ampanyi.

11Yi ku nyabye manayi zafun nya bye, nfya bugba mi. Kwo duwyi lo nu yi-i ya nya nyagyi ɓo n na jeyi nfya ba? 12Fye ga azaje ɓa, nɓa zhin fye waʼazi nyi, ko bmiya lo fya zhin lonu. Ama yi to gna bmiya zhilo n fya ba n ɓa yin? Dudu lonu yito zhan-pma n iko gna bmiya-zhi nya yim, ama ya zhin tnu-tnu nʼya bwa yi ntu na nya ɓo, n yi ɓa pmai lo, ntna fye bma-zhin. Yi to shin gna ge a gba yi tnu-tnu ta n nyaho-nyahoi yim, ntu dnaɓo ge sakun ya nya fya mawye-ya n Kristi ɓeda, nʼya ɓe fye cei nyi.

13Fye ta kpe lo ge Shekowyi ɓei gna, a bmazhin-yi n na tnu-tnu zhinyi yi n na duwa nyakun ge, ɓa bwa ɓa lobo n ɓa nyagyi yi dna na nyagaga, n na nyagyi yi na ɓe wo cei na duwa nyakun nyin? 14To ko wu lo nu, Shekwoyi ku da ge aza ɓa zhin waʼazi, ɓa bwa bmazhin n na za ba n ɓa gwo kwo nyi. 15Ama mito shin fye kobo ɓo nyam. Mi-i ta ka fye ma gna fye ge miye ma ya gwo nu nʼsaiyem. Sai dai ma gyi fifi ko n mikun yi, ceya cece ge mi bwi agmada nuwan, nmi bwa dna waʼazi n mi zhin fye n tna nyaho gwoi nyi. 16Waʼazi zhin to zhin ɓo gbegyi nya nu nʼmabam–mi ta mi ma fa ko zhin ɓo ko mi ya kni ge mʼba fam, Miɓa ze oɓo sun-sun nya. Aiya mʼma ba to-miya zhin waʼazi m. 17Ndei ko ɓo lo ge omi bugba na la ma zhin tnu-tnu-ye Shekwoyi wo gami ko lada; ama ko to wulo lonu nun, ntuge Shekwoyi nu na kni mi Woi dna mi tnu-tnu ye n nakun mi-i to n mihin ɓo kni-yi lo n shan sun. 18Knihi nu zhin mi lada koi wuzhi la ya? Konu zhin agmada nʼmi bwa dna waʼazi Nabari Manayi nya, nʼmi zhin to miyi tu zaho azhin, mi-i gna a gbami lada waʼazi zhin nyam.

19Deye na pmai lo mwa; shi konyi mito dna lo nʼzaho sinta ma viwo ɓeye ge gye wo gba ma gyiwye lon, dudu lonu mila mihin ze aza vinya fyenu dna bugba-da n nabai ma gni ɓa ga Kristi. 20Esa mi zhin tnu-tnu na Yahudiyi aba, ma ze ngye Yahudiyi n nabai ɓa wo Nabari manayi, ma gni ɓa ɓe cei n Kristi aba. Esa mi gni na aza ʼba nɓa vi a Yahudiyi knunu, mi ta gni aɓena nela yin, ko da ya ke omi bugba to cei yelo lonum, ntuge mi cei pma ma bma ɓa zhin. 21Esa mi gni na ɓenai aba, mi zhin ma bugba ga ɓa she mi ɓa mi, ama dole ma zhin ɓo ko bmiya a Yesu-viyi aba. Omi bugba ga n mi ga ɓa nyi, ko ɓa zhin ma ka ɓa bugba wan shi, ma bma ɓa zhin.

22Esa mi gni naza-ba nɓa to n kalai lo dna gaiciya gam, ma ze tnakala-da, nnabai ma bma ba zhin. Ntu cenu mi la mihin gbodo n zahozahoi yi ntuge ko wuso-wuso, oza ye ge mi gna wo Kristi ɓeda, n nabai Kristi wa gni wo. 23Mi zhin aɓoye vinya ntuge ma si ɓa kpe n Nabari Manayi yi, njesun ntu na anabarka ɓo n mi bwa, sa ma gye ɓai ɓe da Kristi.

La Hohin Yi Ha Gyi Nasara

24Lalle fye kpelo ge nna wyefan ba, asubui vinya nu zhin ɓa busi, ama zaknayi nu zhin wa bwa lada kmisun-yi gwo. Ntucenu fye bui si ntuge fya gwo lada-yi. 25Zaho-zahoi wo zhin wyefan-yi wo zhin wa gawo nayi wahala, woi tu aɓomwi, woi wan aɓo fi. Wo zhin lo nu ntuge wa gwo lada nu nkwo ta mwa sa m. Ama yi zhin ntuge ya gwo lada eshe nya nu n koɓa mwasa har nyalonyalo. 26Ntuce nu mi busi n na wyetu yi na bye. Sa mi zhin dambye, ma sha akun ma ku ɓa mwi kpa, to ma she ɓa fi nʼsem. 27Cenu zhin mi-i ga mi nayi tata, kwa zhin ɓo na ye cei, toge ɓonu ko yem. N mi to zhin lonun, odna wo mi lo ge sakun ma ku waʼazi zhin azaje ɓa ku lofi n na gbegyi ba, ama aila miyi dai gmiya ge mi to kunce lom.